Aguest maitin an estat trasladats es 3 ossardets d’Aran Park enquiath Parc Animalièr Pyrenées que se trape apròp dera localitat francesa de Lourdes. Indu, Misha e Trona, dejà repòsen ena sua naua casa dempús de qu’aué an deishat era Val d’Aran. Es agents forestaus dera Val d’Aran e de França s’an encuedat d’amiar a tèrme aguesta operacion. Prumèraments se les a sedat e dempús se les a plaçat en ues caishes especiaus. En tot profitar aguest traslat, s’a castrat a Indu, eth ossardet mascle e a Ben, er os adult. D’aguesta manèra, s’evite que poguen reprodusir-se en futur.

En tot moment, era equipa de veterinaris an controtlat er estat des ossardets, pr’amor qu’auien un sedatge hloish e auien de trebalhar deprèssa.

D’aguesta manera, es ossardets s’an trasladat tà França, a on non auràn problèmes d’espaci. Aran Park mantierà era parelha d’adults, e non se demore, per ara, que i age ua ampliacion des ossi ena installacion deth Portilhon.