Set pòdiums entàs patinadores deth CEGVA en Campionat de Catalonha e ena Prumèra Copa Vielha

14/03/2017

Entre es patinadores deth CEGVA cau destacar ara aranesa Naia España, que conseguic er aur tant en Campionat de Catalonha coma ena Copa Vielha

Era passada dimenjada auec lòc en Palai de Gèu eth Campionat de Catalonha e era Prumèra Copa de Vielha de patinatge. Era caracteristica mès remercable d’aguest eveniment tant important ei que, per ua banda, se tractaue d’era prumèra Copa pròpia deth territòri, organizada peth Club d’Espòrts de Gèu Val d’Aran (CEGVA), e, per ua auta banda, se celebraue tanben eth Campionat de Catalonha. Un eveniment multitudinari qu’acuelhec un totau de 125 patinadors vengudi de toti es clubs d’Espanha e Andòrra.

Aguesta que s’a celebrat ei sonque era prumèra fasa deth Campionat de Catalonha, qu’ei eth prumèr viatge que s’a agut de dividir en dus pera sua nauta participacion. Era dusau fasa se celebrarà eth 22 d’abriu en Barcelona.

Aguesta doble competicion compdèc damb era preséncia de 9 patinadores araneses (Irene Arís, Claudia Capdevila, es fraies Naia e Iria España, Sara Monteagudo, Lucía Sanchez, Griselda e Georgina Serrallach e Noa Villacampa) en categories nacionaus qu’aueren de superar ues pròves de grana dificultat entà arribar ad aguesta categoria.

Es patinadores deth CEGVA artenheren un totau de set pòdiums: Naia España, dera categoria DEBS, se proclamèc guanhadora tant en Campionat de Catalonha coma ena Copa Vielha, Aina Masip, dera categoria Basic Novice B, quedec dusau ena Copa Vielha e se portèc er aur en Campionat de Catalonha, e ena 2au categoria Georgina Serrallach siguec era tresau ena Copa Vielha e era dusau en Campionat de Catalonha, hèt que permetec a Iria Espanha remontar ara tresau posicion en aguest madeish Campionat.

Pera sua part, Griselda Serrallach mostrèc era gran milhora qu’a artenhut en sòn prumèr an en patinatge e se classifiquèc ta Junior 1èra, que ei categoria internacionau.

Per ara, eth CEGVA se trape concentrat enes sues pròplèus cites, peth moment, era següent competicion dera Lliga Catalana serà era deth Cim de Canillo en Adòrra. Ath delà, toti es patinadors que se trapen en categories autonomiques disputaràn era dusau fasa deth Campionat de Catalonha, er Open de Euskadi e eth Campionat d’Espanha ena pista de Puigcerdà, totes tres celebrades pendent eth mes d’abriu.

IMATGE: CONSELH GENERAU D'ARAN

Clara Villar