Emocion e gòi ena prumèra trobada internacionau de coraus qu’a acuelhut Bossòst ena sua glèisa. Es coraus convidades sigueren era “Contrapunt” de Malgrat de Mar e era Battant de St Geli dau Fesc, de Montpelhèr.

Ath delà, es coraus amfitriones araneses sigueren era Corau Margalida de Bossòst e es Paoesses de Vilamòs, totes dues dirigides per Lúcia Mas.

En aguesta trobada internacionau de coraus se hèc aumenatge ara figura de Mn.Condò Sambeat, pr’amor qu’enguan se commemòre eth centenari dera sua mòrt. En aguest sens, se liegec era sua biografia e se cantèc ua des sues òbres, “Era Caritat”.

Es membres des coraus expressèren era sua satisfaccion e orgulh per auer participat en aguest eveniment musicau: un simbèu de fraternitat entre coraus vengudes de disparièrs païsi.

Entre es cançons qu’era Corau Margalida e es Paoesses de Vilamòs an cantat, s'i trapen “Nosati baisharem des montanhes” e “Yo lo soñé”. Sense dubte, un trabalh que requerís d’esfòrç e de fòrça ores de dedicacion.

Uns amics que, dempús der exit d’aguesta prumèra trobada de coraus, segur que tornaràn a trapar-se entà aufrir mès concèrts. Pr’amor qu’eth missatge qu’aguesta trobada dèishe ei clar: “Era musica ei eth mès bèth des lenguatges”.