Protèsta de Mountain Wilderness ena estacion de Baqueira Beret pes projèctes d’ampliacion

26/03/2017

Era entitat sense ànim de lucre catalana a organizat aué ua caminada reivindicativa còntra es ampliacions dera estacion aranesa dejós deth lèma “Per unes muntanyes de qualitat”

Era associacion Mountain Wilderness Catalunya a realizat aguest maitin ua caminada popular reivindicatiua damb raquetes de nhèu e esquís de montanha des deth Plan de Beret enquia eth Cap des Clòsos, entà manifestar-se en còntra des propòstes d’ampliacion constants dera estacion d’esquí aranesa Baqueira Beret.

Mès d’ua vintea de persones an participat en aguest eveniment entà reivindicar qu’aguestes ampliacions deterioren eth terren e hèn a pèrder qualitat ath paisatge.

Rebrembam qu’enguan s’acordèc ua ampliacion de mès de 5 quilomètres ena zòna de Beret entara tempsada 2017-2018, projècte que se soma ara propòsta d’expansion dera zòna dera Peulla, que preten bastir tota ua estacion autònoma connectada a Baqueira Beret, que s’estenerie pes limits deth Parc Nacionau d’Aigüestòrtes e Estanh de Sant Maurici e que se trape encara ara demora d'arrecéber er informe d’impacte mieiambientau entà auer lum verda.

Des de  Mountain Wilderness Catalunya se reclame qu’es pistes d’esquí existents ja dispausen de centenats de quilomètres esquiables e que complissen damb ues foncions recreatives e de dinamisme economic mès que suficients, e que era aparicion d’aguesti constants projèctes d’urbanizacion impliquen ua grana amenaça entara qualitat des montanhes.

IMATGE: MOUNTAIN WILDERNES CATALUNYA
Clara Villar