Pendent eth plen darrèr ordinari dera Deputacion de Lhèida, se desestimèc ua mocion presentada pera oposicion entà demanar ath govern liderat peth partit democrata catalan de Joan Reñé era creacion d’ua comission tà definir era distribucion des subvencions municipaus d’enguan. Aguesta mocion compdèc damb eth vòt a favor de lèu tota era oposicion, e sonque Unitat d’Aran que compde damb grop pròpi, optèc pera abstencion. D’aguesta manèra, i auec un empat a 12 vòts, e eth vòt de qualitat deth president Reñé, decantèc era balança. Eth deputat Paco Boya, defenie eth sòn vòt en tot allegar un acòrd de governabilitat en quau trebalhen damb era equipa de govèrn.

Maugrat qu’Unitat d’Aran e PSC non opteren peth madeish vòt, cau remercar er hèt de qu’es aranesi an grop pròpi ena Deputacion. Eth govèrn de Reñé manifestèc que se podie tractar d’ua mocion de censura en cobèrta, hèt qu’Unitat d’Aran descartèc totauments. Era bona relacion entre eth Partit Democrata Catalan e Unitat d’Aran s’a vist reflectit en diuèrsi airaus dera Val d’Aran.

Pendent es pròplèus setmanes coneisheram mès detalhs des relacions entre Unitat d’Aran e eth govèrn dera Deputacion de Lhèida entà amiar a tèrme ua analisi des acòrds as quaus arriben ambdues parts.