Tot just manquen quinze dies entara celebracion d’ua naua edicion dera Trail Carlac, era pròva esportiua per excelléncia deth terçon de Quate Lòcs, qu’enguan artenh era 4au edicion. Era sedença deth Conselh Generau d’Aran acuelhec era sua presentacion, ena quau i trapam diuèrses modalitats qu’auràn lòc pendent eth 16 e eth 18 de junh. Diuendres dia 16 s’iniciaràn es corses damb eth Sprint Verticau d’1,3 kms. Dissabte 17, aurà lòc era Montlude Skyrace de 26 kms en tot passar peth Tuc des Nères e eth Montlude. E dimenge 18 auràn lòc era rèsta de corses. Per un costat, era Maraton Quate Lòcs de 43 kms en tot passar pes quate municipis deth terçon. E, ath delà, es pròves classiques de Bòsc de Carlac en tot pujar enquia Bausen e era corsa Vila de Les de 9 kms de caracter popular e que se poderà hèr tanben caminant.

Era organizacion demore qu’enguan i torne a auer ua grana participacion enes diuèrses pròves, se ben i aurà ua limitacion a 350 corredors entà non massificar fòrça era competicion. Un eveniment, que fòrça especialistes en aguesta modalitat, empleguen coma entrenament entà corses mès potentes.

Enguan cau remercar qu’es sòns remassats dera inscripcion dera corsa Vila de Les anarà destinada ara Associacion Espanhòla Contra eth Cancer, en tot aufrir un caracter benefic ara corsa. Toti aqueri interessadi en participar en bèra ua des pròves, encara son a temps d’inscriuer-se e gaudir d’ua dimenjada d’espòrt en Baish Aran.