Naua reunion deth SMEAG pera gestion der arriu Garona

01/03/2017

França se trape fòrça preocupada peth canvi climatic e es possibles sequères que poirien afectar, entre d'auti, ath Garona

Eth Conselhèr de Territòri deth Conselh Generau d’Aran, José Antonio Boya, participèc ena darrèra reunion dera comission de consulta e seguiment deth Plan de gestion deth cabau minim der arriu Garona, celebrada en Tolosa e convocada peth Sindicat Mixte d’Estudis e Desvolopament dera Garona (SMEAG).

Eth país vesin se trape fòrça preocupat pes sequères que se previen entàs pròplèus ans, ei per açò qu’en aguesta reunion, ara qu’assistiren es responsables politics e tecnics des territòris pes que passe er arriu atau coma es representants des diferents confederacions idrografiques, se merquèc eth plan d’accions que se realizaràn pendent eth periòde de 2017 a 2026.

Eth Govèrn d’Aran dejà manifestèc era sua disposicion entà collaborar en toti es plans de gestion deth Garona. De hèt, hè dus ans, dèc impuls ara junta d’explotacion der arriu, amassa damb es autoritats franceses, entà tractar toti aqueri aspèctes qu’auien a veir damb era conca deth Garona en sòn pas pera Val d’Aran.

Clara Villar