Era joena promesa der esquí nòrdic, Lydia Iglesias, e era start-app aranesa OcSTEM Solutions an signat dejà eth son acòrd de collaboracion. Se tracte d’un acòrd de dus ans que cercarà melhorar es resultats d’era esportista e previer possibles lesions mejançant eth recuelh de donades o Big Data.

Tot e qu’enes espòrts d’iuèrn non ei ua tecnica guaire coneishuda e resulte molt pionera, era analisi de donades ja hè ans que s’utilize fòrça en espòrts coma eth basquet, eth futbol o era Formula 1.

En aguest cas, des d’OcSTEM Solutions s’analisaràn tot tipe de donades: historiques, climatologiques, topologiques o mediques, entre d’autes, e se demore començar a veir melhora en un lapse de temps d’entre sies e nau mesi, e auer eth sistema totauments implementat en un an.

Segontes Jacint Berengueras, fondador dera start-app, “er objectiu d’aguesta collaboracion ei includir tant en entrenaments coma en competicion er emplec de metodologies STEM entara melhora constant dera esportista, evitar risqui de lesion e premanir es competicions damb era major quantitat d’informacion possibla”.

Peth moment, era joena fondista a un gran repte per deuant: en pògui dies debutarà en Campionat deth Mon celebrat enes Estats Units, oportunitat pera quau non poderà participar ena Marxa Beret d’enguan.