Era titular deth jutjat numero un de Lhèida a absolvut ar ex baile de Vielha, Joan Riu, deth delicte urbanistic deth qu’era Fiscalia li acusaue per auer concedit tres licéncies illegaus.

Segontes era senténcia, aguestes licéncies sigueren concedides de manèra illegau, mès non s’a podut provar que Riu ne siguesse conscient e, per aguest motiu, a estat absolvut de toti es cargues.

Era querelha que portèc Joan Riu a judici è quate mesi siguec interpausada peth tanben ex baile de Vielha, Josep Calbetó. En concrèt, se denonciaue era concession de licéncies entà reformar tres cabanes.

Era Fiscalia entenec qu’es hèts que relataue aguesta querelha èren un delicte urbanistic e demanauen ta Riu ua condemna de tres ans de preson. Era senténcia afirme qu’es òbres que se portèren a tèrme pes tres persones beneficiàries des licéncies “excedien era simple construccion de cabanes”, e s’ahig que “es òbres non s’ajustauen ara normativa urbanistica aplicable en aguesta matèria ena Val d’Aran”.

Ena resolucion judiciau s’explique que, segontes er acusat, Joan Riu, eth signèc eth Decret d’Alcaldia en quau se concedien es licéncies confiant ena sua legalitat. Per tant, era jutgessa a acreditat que Riu concedic es licéncies sense èster conscient de que èren illegaus e arbitràries.  

IMATGE: DIARI SEGRE