Dempús des darrères nheuades que i a agut ena Val d’Aran pendent es prumèri dies de hereruèr, qu’a caperat de color blanc lèu tot eth territòri, en Baqueira Beret s’an trapat damb ua quantitat de nhèu plan importanta, que permeterà qu’era estacion pogue gaudir de bones condicions enes desparièrs parçans pendent es pròpleus mesi. Sustot, cau tier en compde era visita de fòrça francesi en ues setmanes mercades pes hèstes de Magràs tanben en Estat Espanhòu.

Enquiara era sason d’iuèrn ei fòrça bona, se ben sonque en deseme es donades d’esquiaires siguec mès baisha. Mès, damb era arribada dera nhèu naua, es previsions de cara a hereuèr, mès sustot, en tot pensar enes mesi que vien, son positiues, e se demore barrar aguesta sason damb granes donades enquia abriu. Aumens, es sollicituds an anat en aument pendent es darrèri dies.

Aguestes darrères nheuades auguren uns boni mesi finaus dera sason d’iuèrn, enquiath barrament dera estacion fixat entath 17 d’abriu, un viatge finalizades es hèstes de Pasca.