Es darrères notícies sus era evolucion dera Covid-19 ena Val d’Aran non son guaire esperançadores. Era tendéncia d’establitat dera incidéncia deth virus qu’eth territòri venguie d’experimentar enes passades dues setmanes se trinque en tot detectar-se qu’era linha de naui de contagis e de risc de rebròt torne a pujar en parçan. 

Enes darrères 24 ores s’an confirmat 12 naui casi positius, en tot aumentar a 675 es positius totaus ena Val d’Aran der 1 de gèr ençà.

Preocupe tanben er hèt de qu’era Val d'Aran a eth risc de rebròt mès naut de tota Catalonha, en tot plaçar-se per dessús des 1800 punts, deth temps qu’era RT se place en 1,46.  

Atau madeish, son dejà 16 es persones qu’an morit pr’amor deth virus en Aran der inici dera pandemia ençà. En aguest sens. era darrèra mòrt notificada siguec ager, d’ua persona de 63 ans ingressada ena planta COVID-19. 

Pera sua part, eth govèrn aranés insistís en besonh seguir totes es mesures preventives establides pes autoritats sanitàries e rebrembe que cau redusir ath maximom era interaccion sociau.

En çò que tanh ara pression espitalària, es ingrèssi ena planta COVID-19 der Espitau Val d’Aran seguissen aumentant. Enes darrères 24 ores s’an amiat a tèrme 3 naues espitalizacions, en tot aumentar a 12 es persones ingressades peth virus.