Era Casa deth Senhor d’Arròs a acuelhut aguest maitin eth plen ordinari deth Conselh Generau d’Aran, a on s’a aprovat per unanimitat ua declaracion institucionau tà demanar ath nau govèrn dera Generalitat de Catalunya que consolide e respècte er autogovèrn dera Val d’Aran.

Ua demana que hè era maxima institucion dauant des eleccions autonomiques que se hèn aguest dimenge e que non an de suposar, independentament des resultats electoraus,  un cambi enes relacions institucionaus entre es dues institucions. En  manifèst s’an detalhat es besonhs institucionaus d’Aran tà seguir damb eth trabalh qu’amie a terme eth sòn govèrn.

Era sindica d’Aran, Maria Vergés, explicaue es detalhs deth document: “Aguesta declaracion se harà a arribar ath nau govèrn dera Generalitat de Catalunya tà mercar era basa d’ua huelha de rota damb qüestions vitaus tath foncionament der autogovèrn d’Aran coma ei eth desplegament dera Lei d’Aran e de tot eth domèni competenciau, poder compdar damb un modèl de finançament definitiu que mos dongue estabilitat, tanben eth respècte e impuls dera lengua e cultura dera Val d’Aran”.

E a hijut:” En aguest manifèst tanben auem hèt ua reclamacion tà compdar damb un districte electorau pròpri que mos permete ua eleccion dirècta d’un deputat, ja que consideram que toti aqueri debats que tanhen ara Val d’Aran an d’auer ua figura presenciau aranesa tà deféner era realitat que se viu en pais”.

Era sindica d’Aran a volut arregraïr “eth supòrt deth grop dera oposicion, en aguesta qüestion de país, çò que mos legitime encara mès ena nòsta demana unanima coma maxima institucion”.