Eth Conselh Generau d’Aran a anonciat dejà eth nòm dera naua directora deth Musèu Val d’Aran: Carla del Valle Lafuente. A estat seleccionada dempús de superar eth concors public de seleccion de personau foncionari interin qu’eth madeish Conselh dauric hè uns mesi.

Del Valle a artenhut era puntuacion globau mès nauta en un procés que compdaue damb un tèst e ua entrevista e que valoraue eth projècte e es merits pròpis des candidats e candidates ath trebalh.

Era naua directora deth Musèu Val d’Aran ei licenciada en Istòria der Art pera Universitat Autònoma de Barcelona e compde damb un màster dera Universitat de Murcia. Comde damb era experiéncia d’auer trebalhat en Musèu Municipau de Sabadell, en Musèu Nacionau d’Art de Catalonha e coma assistent de direccion dera Galeria Barbier. Ath delà, ei era autora de ”Er encensèr romanic de Betren. Un exemple de patrimòni retrobat dehòra des nòstes termières”.

Rebrembam qu’eth Musèu dera Val d’Aran (situat ena Tor deth Generau Martinhon) hè un repàs ara istòria deth territòri mejançant ua amplia colleccion d’objèctes arqueologics, artistics e etnografics.

IMATGE: CONSELH GENERAU D'ARAN