Eth Grop de Rescat de Montanha (GRM) dera Val d’Aran organizèc ager ua jornada de formacion de rescat de lauegi ena montanha ara qu’assistiren unitats deth GRM Pompièrs d’Aran, eth Centre de Prediccion de Lauegi deth territòri, es pisters de Baqueira Beret, diuèrsi guides de montanha e Forestaus e quauqui agents des Mòssos d’Esquadra, Gendarmerie francesa e Ertzaintza.

Aguest eveniment servic entà ensenhar as participaires era coordinacion qu’an d’auer quan actuen en escenaris damb diuèrses victimes en cas de lauegi e quines son es fases deth rescat (avís d’accident, accion der operatiu, recèrca, rescat organizat e tractament des victimes), entre d'autes causes.

Pendent eth maitin, es expèrts deth GRM expliquèren eth nau esquema de gestion deth servici d’emergéncies e tanben parlèren de prevencion e extincion d’incendis, rescats de montanha... Ara fin, era session acabèc damb ua practica de rescat sus eth terren.

IMATGE: CONSELH GENERAU D'ARAN