Es ossardets d'Aran Park seràn trasladats eth pròplèu dia 21

13/03/2017

Per manca d’espaci Indu, Misha e Trona seràn trasladats ath Parc Animalier des Pyrénees

Dejà i a data entath traslat des petits ossardets Inda, Misha e Trona: abandonaràn Aran Park eth 21 de març damb destin ath Parc Animalier des Pyrénees, ena poblacion francesa d’Ayzac-Ost. 

Es tres petits, neishudi er an passat en aguest espaci de semi-libertat, an d'ester transalats pr'amor qu'eth barratge se quede petit entà cinc osi, segontes afirmen hònts deth madeish parc. Ath delà tanben existís eth problèma de que Indu, un des tres ossardets, ei mascle e eth sòn pare veirie ath petit coma un competidor quan era femelha torne a entrar en calor e de ben segur que acabarie atacant-lo.

Rebrembam que degut as elevats neishements d’ossi en captivitat que se produsissen en tot er estat (e era dificultat entà trapar-les naui parcs a on plaçar-les) er os mascle d’Aran Park serà esterilizat entà que non pogue auer mès hilhs e evitar aguestes situacions.

Aran Park daurirà de nau es sues pòrtes eth dia 1 d’abriu. Er orari, coma tostemp, serà de 9 deth maitin enquias 6 dera tarde en tempsada baisha e es mesi de juriòl e agost enquias 7 dera tarde. Rebrembam tanben qu’eth parc compdarà damb un nau atractiu: es quate exemplars de lop europèu qu’abiten desde gèr d’aguest an.
Clara Villar