Eth Conselh Generau d’Aran premanís era elaboracion d’ua candidatura entà demanar ara UNESCO qu’eth conjunt dera Val d’Aran sigue declarada coma Patrimòni Mondiau. Maugrat que se tracte d’un projècte fòrca ambiciós, encara se trape en ua fasa iniciau, ena qu’ei de besonh realizar un prètzhèt prealable que pòt durar diuèrsi ans, pr’amor que s’a d’elaborar un inventari damb tot eth patrimòni naturau e istoric que dispòse era Val d’Aran.

Aguest projècte dera Val d’Aran se presentarà ara Generalitat de Catalonha, que serà qui lo presentigue ar Estat Espanhòu, entà qu’aguest sigue qui fin finau l’acceptigue e lo defensigue deuant dera UNESCO d’ací a uns ans.

Era elaboracion d’aguest projècte ei ua des accions que s’includís laguens dera contractacion d’un tecnic exterior en airau de cultura, qu’en aguest cas ei Jèp de Montoya, antic cap de cultura deth Conselh Generau d’Aran, adjudicat per 27.000€.