Derròta per 1 gòl a 0 dera UE Bossòst ena sua visita ath Bagnères de Luishon Sp. en "Derby deth Portilhon" celebrat aguest passat dissabte 18 de març en partit corresponent ara 16au jornada deth Championnat Excellence. Sonque un gòl lis servic as francesi entà guanhar aguest partit, damb eth quau artenh un doble prèmi, pr'amor qu'a compdar d'aguesta jornada, andues equipes son empatades ena classificacion, damb 37 punts, ena 4au e 5au plaça. Ua derròta pera mínima, mès que supause era fin a un totau de 3 jornades sense pérder des aranesi. Maugrat aguest mau resultat, es de Quate Lòcs contunhen en ua bona dinamica ena liga, pr'amor que sonque son a 2 punts deth 3au classificat, eth Pyrenées Sud Comminges. Se ben ei cèrt qu'es dues prumères places dera taula dejà son un objectiu lèu impossible, pr'amor qu'autant era US Cazeres 2 coma eth FC Mabroc, son fòrça luenh. Ara madeish a 15 e 18 punts respectivaments. 

Pendent era pròplèu jornada, era 17au deth campionat, era UE Bossòst visite eth camp dera Etoile du Cagire. Eth partit serà aguest pròplèu dimenge 25 de març a compdar des 15:00. Dejà ena anada, jogat pendent era 7au jornada deth campionat, era UE Bossòst guanhèc ara Etoile du Cagire per 3 gòls a 1. Per tant, ei ua bona manèra de tornar ath camin des boni resultats, pr'amor qu'eth Cagire son es darrèri ena taula deth campionat. 3 punts que se demoren fòrça importanti entà sajar d'encarar damb optimisme era fin dera sason 2016/17.