Destacada
Era Generalitat subvencionarà damb 40 mil euròs as entitats dedicades ath foment der aranés
Pendent er an 2016, des deth Conselh Generau d’Aran se destinèren uns 113.000 euròs a foment dera lengua. Entre es actuacions mès destacables se trapen es revirades de mès de 500 tèxtes ar aranés, entre eri tèxtes dera pròpia Generalitat, eth teatre ena escòla o es diuersi prèmis literaris e culturaus que se celebren en territòri, entre d’auti.
Ena darrèra amassada deth Conselh de Politica Lingüistica der Occitan Aranés, celebrada ena sedença deth Departament de Cultura dera Generalitat de Catalonha, s’exposèren totes es actuacions hètes en airau de foment e normalizacion lingüistica per part deth Conselh Generau d’Aran e dera madeisha Generalitat.
En aguesta amassada se presentèren es pressupòsti entar an 2017 e eth govèrn d’Aran volec hèr ua demana entà milhorar eth finançament dedicat as actuacions lingüistiques e ara promocion der aranés.
Era Generalitat de Catalonha presentèc, pera sua part, era dubertura d’ua naua linha de subvencions damb valor de 40 mil euròs qu’anaràn destinades a aqueres associacions e entitats dedicades ar estudi e foment der occitan aranés.
Ena aguesta amassada s’exposèren tanben es actuacions der Institut d’Estudis Aranesi. Eth president dera institucion, Jusep Lois Sans, presentèc es trebalhs e estudis realizats per part dera instutucion, entre es quaus destaquen es publicacions Vocabulari aranés de Jusèp Condò e Elements de morfosintaxi der aranés de Joan Coromines.