Eth Servici de Gestion de Residus dera Val d’Aran desvolòpe, des deth dia 13 d’hereuèr e enquia acabar era tempsada d’esquí, ua campanha de recuelhuda de fraccion organica pòrta per pòrta as grani productors d’aguesti residus (otels e restaurants) deth Naut Aran e Vielha e Mijaran.

Eth servici se preste cinc dies ara setmana (de deluns a diuendres) e, a compdar dera sua implantacion, s’an recuelhut mès de 5 tones setmanaus de fraccion organica de bona qualitat.

En un principi, aguesta campanha compdaue damb era participacion d’ua vintea d’otèls e restaurants, mès era donada s’a anat incrementant e s’i an incorporat mès establiments.

Segontes eth Conselhèr de Territòri deth Conselh, José Antonio Boya: “Eth succès d’aguesta campanha non auesse estat possible sense er interès e bona collaboracion d’aguesti grani productors deth sector toristic que s’i an aderit”.

Aguestes accions de sensibilizacion mieiambientau permeten ara Val d’Aran auançar entà un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau.

IMATGE: CONSELH GENERAU D'ARAN