Destacada
Era Aubèrja Era Garona e er estat dera C28 entre es tèmes tractadi en darrèr Plen deth Conselh Generau d'Aran
UA insistic ena necessitat de milhorar era situacion dera C28 dempús des coes que s'an tornat a patir aguesta passada dimenjada
Pendent era darrèra session ordinària deth Plen deth Conselh Generau d’Aran s’aprovèc, per unanimitat, era resolucion deth contracte d’arrendament de negòci dera Aubèrja Era Garona entara sua gestion e explotacion. Rebrembam que è uns dies era Fondacion Pere Tarrés, empresa que guanhèc eth concors public enta hèr-se damb era gestion dera Aubeèja, anoncièc era sua volontat de prorogar era signatura deth contracte enquia qu’eth Conselh no disposèsse de toti es documents administratius que s’an de besonh.
Des dera oposicion s’instèc ara necessitat de milhorar era situacion dera carretèra c28, qu’aguesta passada dimenjada se tornèc a veir afectada pera gran afluéncia de tràfic. Des deth Govèrn s’a explicat que ja i a un nau estudi entà resòlver aguesti colapses e que s’està sajant de cercar ua solucion entad aguest problèma çò mès lèu possible.
S’arribèc ara aprovacion definitiva deth padron de crubament dera taxa de servici de remassada e posterior tractament des lordères entad aguest an 2017, damb un pressupòst aproximat d’un milion e miei d’euròs. S’aprovèren tanben per unanimitat uns auti punts de gran importància entath país coma era mocion entà declarar ath Conselh Generau d’Aran institucion promotora dera Renda Garantida Ciutadana.