Pendent era darrèra session deth Plen ordinari der Ajuntament de Naut Aran, celebrada ager peth maitin, s’aprovèc era modificacion numero 1 des pressupòsti entad aguest an 2017.

“Mos a quedat un remanent de tesoreria de 1’9 milions d’euròs, ath torn de 600 mil euròs mès qu’er an passat” declaraue eth Baile der Ajuntament, Cesar Ruiz-Canela.

Laguens d’aguest pressupòst i a dues partides de 50 mil euros cadua entà milhorar uns pògui carrèrs des pòbles de Gessa e Unha, ua auta de 250 mil entara òbra dera Plaça Major de Garòs e ua darrèra de 350 mil euròs entara milhora de diuèrsi carrèrs en Salardú.

S’aprovèc tanben ua modificacion des nòrmes urbanistiques que pertòquen ara zòna Plaus d’Arties (es cases verdes), segontes eth baile “aquiu enquiara se podien bastir 200 cases e damb aguesta modificacion s’a rebaishat eth numerò a 150, ath delà, era nautada maxima abantes ère de 6 mètres e ara l’auem fixat en 4’5”.

Entre d’autes, se legitimèren tanben es propòstes que contemplen ua linha de subvencions d’enquia 300 euròs entàs vesins de Naut Aran que pinten es sues façades seguint es normes establides per Ajuntament, e era norma que ditz que, a compdar d’ara, toti aqueri qu'inícien òbres enes sòns abitatges o negòcis auràn de plaçar ua placa (que s’aurà de demanar en consistòri) entà hèr saber que se compden damb es licéncies que calen.