Dimenjada deth 31 de març ath 2 d'abriu: que pòs hèr ena Val d'Aran?

31/03/2017

Encara non as pensat qu'haràs aguesta dimenjada? Non patisques, Aué TV te pòrte ua agenda d'activitats çò de mès variada!

Aué, diuendres 31 de març, comence eth cors entara prospeccion de pics ena Val d'Aran, aufrit peth Conselh Generau d'Aran. Ua activitat qu'aurà ua part teorica aguesta tarde de 18:30 a 20:30 ena sedença deth Conselh, e ua de practica deman peth maitin de 07:30 a 12:00. Aguest cors, qu'ei part deth projècte HABIOS, a coma objectiu protegir e milhorar era qualitat des ecosistèmes pirenencs.

Deman dissabte arribe un dia fòrça demorat: Aran Park torne a daurir es sues pòrtes! Grans e petits poderàn gaudir d'un dia ena natura en tot veir de pròp es animaus. Ath delà, enguan eth parc de flòra e fauna aranés a aumentat era familha e compde ara damb ua manada de lops grisi. Vos rebrembam qu'eth parc daurís toti es dies de 09:30 a 18:00, damb ua ampliacion d'orari pendent es mesi de junhsèga e agost de 09:30 a 19:00.

Er 1 d'abriu tàs 18:00 ores arribe ua naua edicion de Teatre Animal, ena sala Era Audiovisuau: Com gat i gos. Gaudís d'ua activitat culturau en familha per sonque 5 euròs

Se te ven de gust dinar òlha aranesa dempús d'un dia d'esquí e nhèu, dissabte te pòs apropar a Beret 1850, a on era Escòla d'Ostalaria de Les n'aufrirà ua degustacion en aguesta naua edicion d'Era Òlhada.E entà acabar ben era tarde, pòs anar tath Bagergue & Antelemark, un festivau musicau que compdarà damb es actuacions de The Maitans, Shit Hit the Fan e DJ Christian, celebrat tàs 19:00 ena sala sociau de Bagergue.

Baqueira acuelherà der 1 ath 5 d'abriu ua naua edicion de Telemark & Friends. Te deisham un link entà mès informacion e inscripcions.

Finauments, era sala Era Audiovisuau mos pòrte aguesta dimenjada un des remakes de Disney mès demorats der an: La Bella y la Bestia, que se projectarà dissabte 1 tàs 22:00, dimenge 2 tàs 17:00 e tàs 19:45 e deluns 3 (dia der espectador) tàs 19:00 e es 22:00.
Clara Villar