Era Conselheria d’Ensenhament destituïc, dimèrcles passat, ara directora dera Escòla Garona de Vielha, per irregularitats ena sua gestion economica e administratiua deth centre. Segontes eth departament, se li a dubèrt un expedient disciplinari que compòrte eth sòn cessament deth cargue directiu e tanben des sues funcions coma professora de matematiques en centre.

Peth moment, non se conesihen guairi detalhs sus era investigacion, sonque que des de juny de 2015, pendent eth temps qu’era directora der estudi siguèc en sòn cargue, aurie estat presomtaments desviant sòs deth centre. Se coneish tanben que tornèc ua part des sòs desviats, mès non er impòrt ena sua totalitat, e que des d’e quauqui mesi, uns auti professors dera escòla auien informat a Ensenhament sus era “mala praxi” qu’e des de direccion s’estaue exercint en aèrs economics.

Des der AMPA tampòc son guairi es detalhs que se coneishen, per acrò madeish s’a exigit ua reunion damb es tecnics deth departament d’Ensenhament, que aurà loc aué madeish, entà poder esclarir era situacion e auer ua explicacion clara sus uns hèts tan greus. Era Associacion s’assabantèc dera noticia dera destitucion era semana passada pendent ua reunion aon non se detalhèren es motius concrets.

Eth cessament dera directora s’a pres coma mesura cautelar mentre era Conselharia investigue aguesta presompta desviacion de sòs, per ara, era cap d’estudis a prenut eth cargue de naua directora entà qu’eth centre non perde era sua normalitat.