Tot e compdar sonque damb 12 jogadors, era equipa aranesa auie era esperança d'hèr un bon partit, mès eth resultat finau acabèc damb un 7-2 en favor deth Vilanova.

Era AF Les arribaue dimenge pera tarde a Vilanova de la Barca damb moltes baishes mès damb fòrça ganes. Lèu era equipa locau s'auançaue en marcador, mès un gòl de Lil ena gessuda deth còrner portec ar empat a 1. 

Ath long deth partit eth bon ahèr deth Vilanova, era mala sòrt e eth desànim deth Les en veir cada còp mès grana era diferéncia en marcador, deishauen un resultat de 7-1, que Ruben Rella podèc milhorar un shinhau damb un gòl enes darrères menutes.

Aguest pròplèu dissabte er AF Les s'afronte en sòn camp ath Roselló tàs 17:00. Aguesta equipa se trape ena 13au posicion, dus lòcs per dessús des aranesi, per tant se tracte d'un partit fòrça important entà daurir diferéncies damb es sòns perseguidors, qu'auràn partits molt dificils.