Er ajuntament de Les a hèt pùblic eth programa dera Shasclada deth Haro d'enguan, que dejà arribe ara 18au edicion. Aguesta hèsta ei eth prumèr eveniment der an restacat damb es hèstes deth huec. Era tradicion iniciada en an 2000, supause era baishada d'ua soca d'auet deth bòsc, qu'aurà lòc en parcatge de Paissàs. Dempús s'aufrís un dinar popular ena Plaça deth Haro, abantes d'iniciar es actes dera tarde. Es vesins deth pòble amien eth haro enquiara plaça, e un viatge plaçat, se producís a èster shasclat. Un viatge retirada era pela der arbe, aguest se deisharà secar, e se plaçarà en centre dera plaça entà Sant Pere, damb era tradicionau Quilha deth Haro, dempús des hèstes de Sant Joan, quan se cremarà er arbe que dejà hè un an qu'ei ena plaça. Enguan, coma nauetat, s'elaboraràn diuèrsi talhèrs: Uns d'elaboracion des halhes decoratiues e tanben d'auti de dances tradicionaus e fòlk. Era jornada finalizarà, precisaments, damb un concèrt de musica fòlk.


Eth programa concrèt dera Shasclada deth Haro de 2017 deth 13 de mai ei:


11:00 - Inici baishada deth haro en parcatge de Paissàs.

14:00 - Dinar popular ena Plaça deth Haro.

15:30 - Inici dera Shasclada deth Haro.

16:30 - Talhèrs d'elaboracion des halhes decoratiues

17:30 - Talhèrs de dances tradicionaus e fòlk

19:00 - Concèrt de musica fòlk



IMATGE:  Ajuntament de Les