Dejà a agut lòc, un an mès, era celebracion dera hèsta des Barbacans en pòble de Canejan. Eth passat dia 11 de març tas 7 dera tarde toti es participaires comencèren a amassar-se ena plaça deth pòble entà vestir-se damb es pèths e es còrnes tipiques d’aquesta celebracion.

Ath torn des 8 comencèc era desfilada des barbacans pes carrèrs deth pòble, qu’anèren acompanhats en tot moment des tamboraires e es Corbilhuèrs de Les. Dempús de tornar ena plaça, se procedic ara crema deth pipòt de magràs e as dances tradicionaus. Ara seguida, er Ajuntament aufric un aperitiu abantes deth sopar popular e era hèsta que seguic.

Era des Barbacans ei uaantiga hèsta tradicionau aranesa que dempús de perder-se pendent es ans dera Guèrra Civiu, se tornèc a recuperar en pòble de Canejan en an 2004.

Tot e que ena actuau celebracion manquen aspèctes istorics dera hèsta originau, eth nivèu de participacion ei cada an fòrça naut e encara e que, peth moment, era celebracion des Barbacans non apòrte grani beneficis economics entath pòble, òc qu’apòrte un gran atractiu mès entara tradicion e era cultura araneses.