Ager auec lòc ena sedença deth Centre Excursionista de Catalonha (CEC) era presentacion dera World Cup Skimo 2017, era Copa deth Món d’Esquí de Montanha. Era darrèra cita d’aguesta competicion aurà lòc es pròplèus dies 8 e 9 d’abriu ena estacion aranesa Baqueira Beret.

Eth dissabte 8 d'abriu se celebrarà era pròva individuau, mentre que dimenge 9 aurà lòc era verticau, coincidint damb era popular “Era Baishada”. Parallèlaments, se celebraràn es pròves Open e era Copa Catalana d’esquí alpin. Era Val d’Aran reberà aquera dimenjada un totau de 600 esquiadors, 120 d’eri participaires deth Mondiau d’esquí.

Aguesta presentacion compdèc damb era preséncia deth Vicesindic deth Conselh Generau d’Aran, Luis Carlos Medina, qu’afirmèc que “auem un territòri ideau entara practica d’aguest espòrt e volem que toti mos coneishen coma ua destinacion de montanha, per aquerò era Val d’Aran apòste pera celebracion d’aguest tipe d'eveniments”.

Peth sòn costat, eth Baile der Ajuntament de Vielha e Mijaran, Juan Antonio Serrano, volèc restacar er important trebalh deth consistòri que “a apostat per compdar damb pròves de gran nivèu en Vielha, a on se celebraràn toti es actes dera Copa dehòra der ambit competitiu”.

Entre es participaires d’aguesta competicion traparam ath lheidatan Kilian Jornet, vigent campion deth certamen enes dues disciplines e que hè pòc se proclamèc campion deth món en verticau e quedèc ena dusau posicion ena categoria individuau.