"Aran-Pirenèus", era naua rota que cerque recuperar eth tram deth Camin de Santiago aranés

16/06/2017

Era naua rota toristica entà recuperar eth tram deth Camin de Santiago que junh Saint Bertrand de Comminges e Berbegal (Òsca), e trauesse era Val d'Aran, dejà a nòm: "Aran-Pirinèus"

Atau ac decidiren ena amassada de dimèrcles passat en Conselh Comarcau de Nauta Ribagorça ua quinzea de representants deth Pirenèu e Pre Pirenèu, entre es quaus se trapaue eth conselhèr de Territòri deth Conselh Generau d’Aran, José Antonio Boya.

Era de dimèrcles siguec era dusau reünion de trabalh entà desvolopar aguesta naua rota, que se demore age un gran impacte toristic e economic, ena que participaràn França, Val d'Aran, Nauta Ribagorça e Ribagorça aragonesa.

En un principi, s'auie acordat qu'aguest camin finalizarie en Roda d'Isbábena, mès en aguesta darrèra amassada se decidic hèr-lo arribat enquia Berbegal entà poder amassar aguest nau tram dem eth de Somontano, que connècte damb diuèrses variantes dera rota, entre eres era catalana. 

Se parlèc tanben d'aderir-se ara Federacion Espanhòla d'Associacions d'Amics deth Camin de Santiago, ja que poirie èster un canau important ena promocion d'aguest camin. Ath delà, s'acordèc qu'era comission de trebalh serà integrada per dus representant de cada zòna e que i participaràn tecnics de torisme e de miei ambient, que seràn es encargadi de definir era vessant tecnica e comerciau dera rota.

IMATGE: CONSELH GENERAU D'ARAN
Clara Villar