Eth darrèr plen extraordinari deth Conselh Generau d'Aran a aprovat eth padron de crubament dera taxa deth servici de recuelhuda de residus entad an 2019. E ac a hèt damb un increment des ingrèssi envèrs er an anterior de 161.000 èuros, ei a díder, un 9% mès. Toti es grops politics deth Plen deth Conselh an votat a favor.

Damb aguest increment, er impòrt previst de recaptacion per aguest exercici ei de 1.678.000 €. Ath delà, cau arrebrembar qu'eth servici de lordères se trape completaments finançat per aguesta taxa.

Era idèa ei que, damb aguest increment d’ingrèssi, se prepause era creacion d’ua naua linha de recuelhuda de residus a la Vau d’Aran entà poder garantir era recuelhuda selectiva, qu'ei çò qu'en aguesti moments distorsione era efectivitat deth servici.

Tanplan, era nòrma europèa de gestion de residus cada viatge ei mès rigorosa  e establís qu'en an 2020 eth reciclatge aurie d'èster deth 60%. Un hèt que, coma ditz eth Conselh Generau d’Aran, aurà de passar pera reeducacion e era concienciacion des usatgèrs entà arténher era solucion definitiua.