Vielha estrearà enguan eth centre trail damb 300 quilomètres de rotes

Er ajuntament de Vielha a aprovat eth projècte deth centre de trail, senderisme e rotes d'esquí de montanha e raquetes de nhèu damb era prevision que s’inagure aguest madeish an.
Aguesta iniciatiua contemple era creacion de mès de 300 quilomètres d'itineraris entre circuits e trauèsses entà córrer, caminar e esquiar enes mesi d'iuèrn.

Ues rotes que se distribuiràn en sies sectors per tot eth municipi des dera còta mès nauta, a mès de 3.000 mètres, enquiara còta 1.000.

Aguesta iniciatiua se presentèc a totes es entitats municipaus descentralizades pendent er ostiu passat e ja compde damb eth supòrt de totes eres qu'ac ratifiquèren enes sòns respectius plens.
Eth projècte, elaborat pera enterpresa Restneige, demore pendent de definir eth finançament e eth modèu de gestion entà poder començar a mercar totes es rotes que recorreràn eth tèrme municipau de Vielha e Mijaran.
En aguest sens, se preten començar damb es òbres çò de mès lèu posible.

D’aguesta forma, eth centre trail se plaçarà en Vielha d'a on gesseràn era majoria des itineraris, accessibles a totes es edats. Tanben compdarà damb ua plana web e ua app mobil tà informar der estat des recorreguts e deth possible perilh de lauegi en iuèrn entara seguretat des usatgèrs.

Ath delà, eth projècte a artenhut subvencions dera Union Europèa a trauès deth programa Interreg-Poctefa, ja que quauqui des itineraris connècten damb Benasque o Luchon.