Vielha e Mijaran s’ahig ara demana qu’eth Conselh Generau d’Aran hè ara Generalitat entà bastir un centre culturau de referéncia

En aguest sens, des deth consistòri se cedís ua parcèla que compde damb usatge entà equipament municipau, plaçada en parcatge des antigues casèrnes militares de Vielha, entà que se pogue acuélher aguest equipament en centre de Vielha.

Eth Conselh Generau d’Aran e er Ajuntament de Vielha e Mijaran an elaborat, de manèra conjunta, era prepausa tath bastiment d’aguest centre culturau, plaçat en ua parcèla cedida peth consistòri en parcatge des militars, e que supausarie un equipament culturau polivalent de proximitat damb fòrça espacis destinadi a diferents ahèrs relacionadi damb era cultura e era lengua.

Era prepausa elaborada includís aules entà impartir corsi e talhèrs formatius de diuèrses tematiques entà un public ampli, un Centre der Aranés dedicat ara promocion e normalizacion dera lengua pròpria d’Aran, un espaci que lotjarà er Archiu Generau d’Aran, era bibliotèca, ua sala polivalenta entà actes escenicomusicaus configurable entà acuélher diferents actes e que servirà tanben entà poder acuélher hèires e congrèssi, e un conjunt d’espacis en relacion entà exposicions e actes dubèrti.

“Aguest centre a estat concebut coma espaci culturau de proximitat e un esturment de coesion sociau a partir deth quau generar e consolidar procèssi de dinamizacion socioculturau” manifestaue eth baile de Vielha e Mijaran, Juan Antonio Serrano, en tot ahíger que “auem plantejat aguest centre culturau coma un espaci de dialòg e de trobada, un lòc a on dar cabuda ara cultura en totes es sues variants e a on es associacions e collectius poguen desvolopar es sòns projèctes”.

Ath delà, ena missiva enviada eth passat dijaus ara conselhèra Garriga, era sindica d’Aran, Maria Vergés, apuntaue que “eth bastiment d’aguest centre serie ua oportunitat entà poder revertir era actuau situacion d’infrainversion qu’era Val d’Aran acumule enes darrèri dotze ans que, atau e coma reflectissen es donades deth departament d’Economia, se trape en -84%, e qu’en matèria de cultura a estat istoricaments fòrça escàs”.


HÒNT: AJUNTAMENT VIELHA E MIJARAN