Vielha e Mijaran molt a pròp de tornar a auer pista de gèu

Er Ajuntament de Vielha e Mijaran dejà a signat damb er Ajuntament de Barcelona eth convèni gràcies ath quau eth municipi aranés dispausarà fòrça lèu dera naua pista de gèu mobila provisionau en Palai de Gèu de Vielha enquia er an 2022.

Pendent es darrèri mesi, eth consistòri a actuat en tot pensar ena sostenibilitat economica e eth futur dera installacion, sense incrementar era sua despena en benefici des sòns usatgèrs e des vesins de Vielha e Mijaran.

Des de que s’auec de barrar era pista eth passat mes de junh per ua grèu pana en sistèma de refrigeracion, aguest a estat un des ahèrs d’urgéncia der Ajuntament de Vielha e Mijaran.

Aguesta notícia permet qu'es usatgèrs d'aguest equipament municipau poguen tornar a emplegar fòrça lèu era pista de gèu dempús de diuèrsi mesi barrada.