Vielha e Mijaran modifique eth pressupòst municipau en 1,3 milions d'èuros

Eth plen der ajuntament de Vielha e Mijaran a aprovat ua ampliacion deth pressupòst d’enguan, avalorat en 1.365.000€. Ei era 2au que s’a hèt pendent aguest exercici, e se destine ara anullacion deth dèute deth Palai de Gèu, realizar milhores en refugi Sant Nicolau, e poder amiar a tèrme òbres en hilat d’aigua. Aguestes son es grans linhes de trebalh que s’a mercat eth govèrn municipau d’Unitat d’Aran.

Precisament, era manca d’inversions ei çò qu’a forçat ara oposicion a votar pera abstencion. E eth hèt de non auer volut mantier cap amassada entà trebalhar conjuntaments aguest ahèr.

Deth còsso que parlaue Àlex Moga, ei Rufino Martínez, que fin finau tanben a votat pera abstencion e a trincat damb era disciplina de vòt deth govèrn d’Unitat d’Aran.

Ath delà, en Plen tanben s’an aprovat es Normes Subsidiàries sus es usatges recreatius, de manèra qu’a compdar d’ara sonque se poderà daurir un negòci d’òci nocturn en tot eth municipi de Vielha e Mijaran, enes zònes industriaus. Demore proïbit hè’c enes zònes residenciaus.

Tanben s’a aprovat eth manifèst des Deputacions de Lhèida e Òsca entà demanar mès seguretat ena Nacionau 230 enquiara termièra francesa.

Fin finau, s’a aprovat ua mocion contra es practiques abusives des companhies electriques e que se complisque eth protocòu de praubesa energetica.