Vielha e Mijaran met ara venta per subasta un veïcul, diuèrses biciclètes estatiques e aparelhs de musculacion deth gimnàs deth Palai de Gèu
11/11/2021
Es interessadi ena licitacion d’aguesti bens mòbles, pòden presentar es sues aufèrtes economiques a trauès dera sedença electronica, entara subasta deth veïcul o damb envolòpa barrada en Palai de Gèu entath materiau esportiu, enquiath pròp
Er Ajuntament de Vielha e Mijaran trè ara venta per subasta diuèrsi bens mòbles patrimoniaus deth Palai de Gèu que a conseqüéncia deth sòn emplec ath long des ans, demoren en desús. En aguest sens, se subasten dus lòts: En lòt 1, s’includís un Seat Altea Freetrack e, en lòt 2, i a vint-e-tres biciclètes estatiques Spinning Star Track deth modèl Spinner Pro, trenta cinc aparelhs de musculacion deth gimnàs (modèl Technogym, SALTER e O’Live) e dus aparelhs de supòrt d’acer e husta Technogym.
Era direccion deth Palai de Gèu a abilitat ua sala a on i demoren toti es materiaus que hèn part d’aguesta licitacion, entà que toti/es aqueri/es que volguen, poguen veder-les abantes de participar-i.
Entà préner part d’aguesta licitacion, i a dus opcions dubèrtes: Presenciaument, en tot recuélher ena recepcion deth Palai de Gèu es documents tara licitacion deth materiau esportiu, entà dempús presentar es aufèrtes economiques damb envolòpa barrada ena madeisha recepcion, e a trauès d’Internet, en tot emplegar era sedença electronica der Ajuntament de Vielha e Mijaran, a on s’i trapen toti es documents de besonh entà participar ena licitacion deth veïcul. Eth termini entà participar finalize eth pròplèu 23 de noveme.
HÒNT: AJUNTAMENT VIELHA E MIJARAN
HÒNT: AJUNTAMENT VIELHA E MIJARAN
Manu Moga