Vielha e Mijaran estúdie opcions entà assegurar era viabilitat deth Palai de Gèu

Eth patac dera crisi dera Covid-19 a accelerat er etèrn debat dera viabilitat deth Palai de Gèu de Vielha. 

En aguest sens, era equipa de govèrn der Ajuntament de Vielha e Mijaran s’a amassat damb es pòrtavotzes des grops dera oposicion entà tractar era situacion actuau pera que passe aguesta installacion esportiua. 

De hè ans, era mantenença deth Palai de Gèu supause ath torn deth 20% deth pressupòst annau deth municipi, un hèt que condicione de manèra importanta es recorsi municipaus. 

Cau arrebrembar, ath delà, qu’ena actualitat era pista de gèu demore barrada e qu’er Ajuntament de Vielha e Mijaran dejà a demanat ajudes entà que se pogue redaurir.

Pendent era passada legislatura s’artenhec eth supòrt, per prumèr viatge, dera Deputacion de Lleida, qu’apòrte 100.000€ annaus entath palai de Gèu. 

Totun, semble que non ei pro entà mantier actius toti es sevicis d’aguesta installacion municipau, e qu’eth debat se pòt alongar enquia arribar a un acòrd qu’esclarisque eth futur deth Palai de Gèu.