Vielha e Mijaran barre 2018 damb lèu 700.000 euròs de superavit

Er Ajuntament de Vielha e Mijaran a barrat es compdes deth passat an 2018 damb un superavit finau de 677.129,34 €. 

“Èm fòrça contenti peth resultat economic des compdes der Ajuntament de 2018, pr'amor que confirme, un an mès, era bona gestion que s'amie a tèrme en Ajuntament de Vielha e Mijaran”, afirme eth baile municipau, Juan Antonio Serrano.

Aguesta donada permeterà qu'en 2019 er Ajuntament pogue amiar a tèrme diuèrses accions financerament sostenibles entà melhorar er estat deth conjunt deth municipi. Ath delà, Vielha e Mijaran contunhe en tot mantier-se damb deute zèro, de manèra qu'eth consistòri seguís auent es compdes totaument sanejadi.

Ei important remercar qu'aguest superavit s'a artenhut sense auer aumentat es impòsti as vesins e vesies.

Segontes er alcalde, aguest superavit permeterà "que pogam contunhar realizant accions de govèrn entà milhorar eth conjunt deth municipi, e ac auem artenhut en tot congelar es impòsti as nòsti ciutadans. De manèra que melhore era economia municipau, sense aumentar era carga fiscau as nòsti vesins e vesies”.