Vielha celèbre un an mès era hèsta de Sant Pònç
12/05/2017
Enguan dejà s'a celebrat eth 26au concors de pastissi, licors e confetures
SOCIETAT
Vielha
Eth pòble de Vielha a tornat a celebrar un an mès era hèsta de Sant Pònç. Ua hestivitat que dejà s’a tornat ua tradicion entre es sòns vesins, e que cada primauera acuelh ua nauta participacion. Era actiuetat clau d’aguesta hèsta ei eth concors de pastissi, licors e confetures. Enguan, dejà se celebraue era 26au edicion. Un concors que prèmie es milhors productes e creacions doces. Ena categoria de pastissi, es prèmis èren es següents: Prèmi ath milhor pastís infantil, milhor pastís sense gluten, milhor pastís salat, atau coma eth pastís mès bon e eth mès originau. Tanben i auie un reconeishement ath milhor licor, era milhor confetura e eth melhor crespeth.
Pendent er acte tanben i auec ua demostracion de codina per part des codinèrs dera Escola d’Ostalaria de Les, que demostrèren coma elaborar un pastís des d’un des centres oficiaus d’Aran. Se liurèren es prèmis corresponents as desparières categories, e fin finau, s’amièc a tèrme un vrespalh popular damb toti es assistents, entà barrar era 26au edicion d’aguesta hèsta, que dejà ei un classic ena primauera de Vielha.
Manu Moga