Vielha anulle eth deute deth Palai de Gèu

Er ajuntament de Vielha e Mijaran a anullat eth deute deth Palai de Gèu, avalorat en mès de 266.000 èuros. Aguesta gran notícia entath cap-lòc deth país s’artenhut gràcies ara inversion de part deth superàvit qu’auie eth consistòri en an 2016, de lèu 463.000 èuros. Eth deute qu’auie enquiara eth Palai de Gèu de Vielha ère conformat per dus crèdits demanadi enes ans 2008 e 2011 quan era gestion d’aguest equipament ère en mans dera empresa publica VIGESA. Eth baile der ajuntament de Vielha e Mijaran, Juan Antonio Serrano, a avalorat fòrça positiuaments aguesta notícia.
Cau rebrembar qu’er ajuntament de Vielha e Mijaran ara madeish ei qui gestione eth Palai de Gèu de Vielha, enquia que pogue trapar ua empresa que sigue qui la dirigisque. Per ara i a diuèrses empreses interessades ena sua gestion, e damb aguesta notícia se demore auer prèst aguest ahèr en ostiu.

Er ajuntament de Vielha e Mijaran damb aguesta anullacion deth deute, ath delà, garantís totauments es lòcs de trebalh deth Palai, en un moment en qu’es donades de sòcis an aumentat. Ath delà, eth palai compde damb un dèficit estructurau, qu’enguan s’anarà esmendant gràcies ara ajuda dera Deputacion de Lhèida.

Dempús de sollucionar era problematica deth Palai de Gèu, er ajuntament de Vielha e Mijaran encara a un superàvit de lèu 200.000 èuros. Enes pròplèus setmanes se coneisherà a on se invertirà aguesta quantitat de sòs en conjunt deth municipi.