Vielha acuelherà eth Banff Mountain Film Festival der 1 ath 3 d’abriu

Eth Banff Mountain Film Festival s’inaugurèc en an 1976, e des d’alavetz a agut 550 sedences internacionaus, damb mès de 1300 projeccions, en tot arribar a auer ua audiéncia de 550.000 espectadors.

Der 1 ath 3 d’abriu, eth cap-lòc dera Val d’Aran se some ath tour mondiau d’aguesta eveniment, qu’aguest iuèrn compde enes Pirenèus tanben damb sedença en Benasque, Jaca e Andòrra. Ua escadença entà assolidar Vielha e Mijaran coma referent tanben ena projeccion de cinèma de montanha, aventura e espòrt extrèm.

Entà d’aquera dimenjada, en Era Audiovisuau de Vielha s’a premanit un programa d’activitats fòrça complèt restacat damb era montanha: Er 1 d’abriu, s’encetarà er hestau damb ua conferéncia dera aupinista e escaladora de parets en solitari, Silvia Vidal, a compdar des 18 ores. Dempús i aurà era projeccion de diuèrsi films (“Follow The Light”, “Dream Mountain”, “Between Walls” e “Exit the North Pole”). Eth 2 d’abriu, entàs 18 ores, er aupinista Ferran Latorre impartirà ua conferéncia en tot explicar era sua experiéncia en tot coronar catorze ueitmils. En finalizar, se poderà veir ua dusau projeccion de films, damb “The Farmer”, “EM”, “Arves En Ciel”, “If You Give A Beach A Bottie”, “Link Sar” e “Girls Gotta Eat Dirt”. E fin finau, eth 3 d’abriu er hestau finalizarà damb era projeccion dera pellicula “La Liste: Everything or Nothing”, a compdar des 19:30. Un film que parle sus tot çò que i a ath torn dera filmacion de diuèrsi descensi pes montanhes des freeriders.

Ja se pòden crompar es abonaments entàs tres dies der hestau, en tot accedir ara plana web:

https://entradium.com/es/events/banff-vielha-2022.

“Èm fòrça contenti de poder recéber en nòste municipi, per prumèr viatge, eth Banff Mountain Film Festival. Ua grana notícia entà toti es amants dera montanha e es espòrts que s’i practiquen, e quin milhor lòc que Vielha entà poder projectar films e poder escotar es viuences des expèrts ena matéria”, comente eth baile de Vielha e Mijaran, Juan Antonio Serrano. E ahig que “des der Ajuntament de Vielha e Mijaran apostam per seguir en tot èster ua destinacion referent de nauta montanha enes Pirenèus, e ac volem refortilhar tanben en airau des hestaus de cinèma de montanha”.


HÒNT: AJUNTAMENT VIELHA E MIJARAN