Vielha acuelh es jornades entà bastir era estratégia der airau foncionau de montanha èst (AFME)
28/02/2024
Eth baile der Ajuntament de Vielha e Mijaran, Juan Antonio Serrano, a participat en Era Audiovisuau de Vielha en acte inaugurau des jornades de procès participatiu entath bastiment dera estratégia der airau foncionau de montanha èst (AFME), qu'an lòc aué e deman en Vielha. Aguesta accion ei includida laguens deth Programa Interreg VI-A Espanha-França-Andòrra (POCTEFA 2021-2027), cofinançada un 65% pera Union Europèa e damb eth supòrt deth Comitat Territoriau Èst de POCTEFA.
Es jornades de trabalh an er objectiu d'identificar es besonhs deth territòri, formular e acordar per consens rèptes e prepausar accions e solucions qu'arresponen as problèmes, atau coma debàter idèes sus es projèctes de besonh entath desvolopament deth territòri.
Es jornades se centren en 3 airaus tematics: salut, espòrt e torisme ar aire liure e dinamizacion economica. Dus grops de trabalh an lòc en Era Audiovisuau e eth tresau en Conselh Generau d'Aran.
Eth Comitat Territoriau Èst ei format peth Departament d'Economia e Isènda dera Generalitat de Catalunya, era Region d'Occitània, eth Ministèri d'Isènda deth Govèrn d'Espanha, eth Secrétariat Général aux Affaires Régionales (SGAR) Occitanie deth Govèrn francés, eth Ministèri d'Ahèrs exteriors deth Govèrn d'Andòrra, eth Departament dera Presidéncia e es departaments francesi dera Nauta Garona, era Arieja e es Pirenèus Orientaus.
HÒNT: AJUNTAMENT VIELHA E MIJARAN
HÒNT: AJUNTAMENT VIELHA E MIJARAN
Manu Moga