Valoracion positiva des prumèri mesi de visites ath nau atractiu culturau de Les: eth castèth de Pijauèrt des sègles XII-XIV
Pendent tot er ostieu s'an aufrit visites guidades autant coma pòrtes dubèrtes tà dar a conéisher eth nau equipament
Valoracion positiua per part der Ajuntament de Les sus es visites guidades e pòrtes dubèrtes que s’a amiat a tèrme pendent aguest ostieu en un des naui atractius culturaus damb es que compde era Val d’Aran, eth Castèth de Pijauèrt dera poblacion de Les.
En aguest nau equipament s’a trabalhat en diuèrses fases ena qu’a subergessut eth trèir tota era vegetacion que hège qu’era tor siguesse en un estat maumerent. Tanben s’elevèc un pis qu’ère documentat e s’i metec losat.
Ath delà, s’an hèt prospeccions periferiques entà acabar d’estudiar totes es rèstes que i a dejós d’aguesta construccion deth sègle XII ath XIV. Se tracte dera edificacion civila mès antiga de tota era Val d’Aran.
Eth Conselh Generau d’Aran seguís en tot premanir un programa especific entà réber visitaires en aguest parçan deth Baish Aran en tot vole’c estacar a un aute des grani atractius damb es que compdarà aguesta zòna coma ei era Casa deth Haro, vinculada as hèstes deth huec qu’esdevenguec Patrimòni Immateriau dera Umanitat pera UNESCO en 2015.
