Unitat d’Aran inste a qu’es pòbles d’Arties e Garòs entren a formar part dera associacion “Los Pueblos Más Bonitos de España”
23/02/2022
Eth representant d’UA ena EMD d’Arties e Garòs, Josep Canut, a sollicitat ara presidenta d’aguesta EMD qu’amie a tèrme es gestions de besonh entà qu’aguesti dus pòbles siguen presentadi entà optar a formar part dera associacion “Los Pueblos Más Bonitos de España” e qu’aguest ahèr sigue debatut e votat ena pròplèu Junta de vesins que se celebrarà aguest mes de març de 2022
Aguest maitin Unitat d’Aran a registrat en Ajuntament de Naut Aran era sollicitud que, a trauès deth sòn representant ena EMD d’Arties e Garòs, Josep Canut, inste ad aguesta pedania a tramitar era demana d’admission ena associacion “Los Pueblos Más Bonitos de España”.
Aguesta associacion, que sage de promocionar es zònes ruraus e es petiti municipis, compde actuauments damb 105 pòbles de tota Espanha e entre eri i é Bagergue, que i entrèc en 2019.
“Entà Bagergue formar part d’aguest hilat a suposat un impuls fòrça important tà dar a conéisher eth nòste pòble e era Val d’Aran, non sonque pendent es tempsades de nauta afloéncia, se non pendent tot er an”, declaraue Marc Tarrau, secretari d’organización d’UA e alcalde pedani de Bagergue.
En aguest sens, Josep Canut, vocau d’UA ena EMD d’Arties e Garòs “aguesta propòsta pensam que pòt èster interessanta tad aguesti pòbles a nivèu toristic, en marc deth projècte de sostenibilitat toristica que tanben impulsam deth Conselh Generau d’Aran ençà”.
Era prepausa dera candidatura a formar part dera associacion a d’èster presentada pera pròpria EMD e complir damb es critèris d’auer mens de 15.000 abitants e auer patrimòni arquitectonic o naturau certificat, “dues condicions que Arties e Garòs complissen perfèctaments”.
HÒNT: UNITAT D'ARAN
HÒNT: UNITAT D'ARAN
Manu Moga