Unitat d’Aran en Tredòs critique era gestion deth servici de neteja dera nhèu dera EMD
11/01/2024
Era equipa d’UA en Tredòs prepausèc ena darrèra junta vesiau ua melhora des condicions entara adjudicacion d’aguest servici, pr'amor qu’era mala gestion de Convergéncia Aranesa en Tredòs deishèc desèrta era sua licitacion pes infracondicions economiques aufertades en tot deishar sense servici as vesins e vesies pendent es prumèrs dies dera tempsada d’iuèrn
Eth govèrn dera EMD de Tredòs decidic modificar eth plec de condicions dera sua licitacion, en tot redusir er impòrt de contractacion notablements en comparacion a ans anteriors, a despiech de qu'es autes EMDs de Naut Aran an mantengut, e inclós melhorat, es sòns plecs. Cau remercar qu'aguesta licitacion quedèc desèrta, dempús de qu'era unica enterpresa que se i presentèc, renoncièc pr'amor des condicions economiques. Ath delà, dempús des darrèri episòdis de nhèu, eth servici de neteja de nhèu dera EMD de Tredòs a resultat èster pòc efectiu, en tot deishar oraris sense corbir, e en tot hèr qu'era brigada de Naut Aran, que normauments se'n encuede dera neteja de Salardú, age de deishar es sues foncions entà corbir es deficiéncies deth servici en Tredòs.
"Damb un pressupòst annau superior as 700.000 euròs, an volut abaratir còsti en un servici essenciau entà un pòble coma Tredòs, en tot deishar sense servici ara poblacion e repercutint directaments ena vida e benèster des nòsti vesins e vesies", manifestaue eth vocau d'UA, Martí Abadia. E higie que, "aguest contracte a estat adjudicat entàs pròplèus 4 ans, Tredòs non se merite auer es carrèrs en males condicions de neteja de nhèu e gèu pendent tot aguest temps. Emplaçam ar equip de govèrn a trabalhar entà melhorar es condicions deth contracte e servici entà qu'aguesta situacion non perdure en temps. E arregraim eth trabalh dera entrepresa qu'actuauments oferís aguest servici, qu'auen d'auti compromisi, a sauvat era mala gestion dera equipa de govèrn de Convergéncia Aranesa".
Atau madeish, eth vocau Sergi Fontanet explicaue, "mos sorpren que, deuant d'uns pressupòsti damb inversions tant nautes coma eth bastiment deth nau centre civic damb lèu 900.000 euròs segontes era documentacion qu’auem, o crompes coma era naua caseta deth Camin dera Bruisha de lèu 30.000eur, pretenguen rebracar despenes en un servici basic tath nòste pòble". En aguest sens, es representants d'UA en Tredòs an volut remercar era importància d'auer ua bona gestion d'aguest servici en tot explicar qu'eth pòble a "d'èster un referent e un exèmple a seguir, atau coma a estat enquia ara en d'auti pòbles de Naut Aran".
HÒNT: UNITAT D'ARAN
HÒNT: UNITAT D'ARAN
Manu Moga