Unitat d'Aran denóncie qu'er Ajuntament de Naut Aran infringís era Lei Electorau

Aguesta denóncia se produsís dempús d’auer comprovat coma aué, 12 d’abriu, er Ajuntament repartís per toti es domicilis de Naut Aran ua revista a on difon eth balanç de govèrn d’aguesta legislatura, quauquarren expressament proïbit pera Lei Organica deth Regim Electorau que non permet hèr difusion dera òbra de govèrn un viatge convocades es eleccions.

En aguest sens, eth pòrtaveu d’UA en Naut Aran, Marc Tarrau a afirmat que “d’Unitat d’Aran ençà consideram deth tot irregular que s’empleguen es recorsi publics entà hèr campanha as pòrtes d’ues eleccions municipaus” e higie que “non comprenem qu’er alcalde de Naut Aran e Convergéncia Aranesa agen tant pòc respècte per aguest municipi e pera sua gent, e que demòstren, nauaments, era sua manca de responsabilitat e d’onestetat”.

Atau madeish, Tarrau tanben a manifestat que “Que s’empleguen es recorsi de toti es vesins deth municipi entà hèr campanha electorau mos semble pòc etic e irregular” ath temps qu’explicaue que “en Unitat d’Aran hèm a arribar aguesta informacion a trauès deth pròpri partit perque èm pleaments conscients de çò que signifique era responsabilitat publica”, e higie que “s’entenerie melhor s’eth govèrn de Convergéncia auesse hèt un balanç annau dera sua gestion, mès s’a limitat a hèr electoralisme e a sautar-se es normes”.


HÒNT: UNITAT D'ARAN