Unitat d'Aran demane ath Govèrn d'Aran que pressione peth desplegament dera Lei d'Aran

Era formacion socialista dera Val d'Aran, Unitat d'Aran-PSC, a demanat ath Govèrn d'Aran de Convergéncia Democratica Aranesa-PNA, qu'exigisque ara Generalitat de Catalonha eth desplegament immediat dera Lei d'Aran. Aguesta demana, que s'a amiat a tèrme ena darrèra session ordinària deth Plen deth Conselh Generau d'Aran, vò acabar damb un "estancament ath quau s'a arribat dempús d'auer-se aprovat en an 2015", comente eth portavotz, Paco Boya. Aguesta demana s'a produsit dies dempús dera amassada deth síndic d'Aran, Carlos Barrera, e eth president dera Generalitat de Catalonha, Carles Puigdemont. 

Des d'Unitat d'Aran insistissen en que s'a de trapar ua solucion a dus ahèrs que non se barrèren damb era aprobacion dera Lei d'Aran: eth sistèma de finançament pròpri e eth sistèma electorau deth Conselh Generau d'Aran. Segontes Boya "era manca de sistèma de finançament des der an 2011, a amiat ua pèrta de capacitat financèra deth Conselh, e mos preocupe eth pòc interès qu'a demostrat eth govèrn de CDA entà sajar de soluciona'c". 

Fin finau, tanben critiquen qu'era Generalitat de Catalonha non a complit encara damb era creacion d'un hons específic entara Val d'Aran, tà corbir es besonhs sus es competéncies traspassades e desvolopar er autogovèrn. 



IMATGE: Conselh Generau d'Aran