Unitat d’Aran apròve es sues listes tàs pròplèu eleccions municipaus e tath Conselh Generau d’Aran
10/04/2023
Era Assemblada Generau d’UA a aprovat es listes electoraus entàs EMD, municipis e Conselh Generau d’Aran tàs eleccions deth pròplèu 28 de mai
Era Comission de Listes d’UA elevèc era passada setmana ara Comission Executiva e Assemblada de militants era prepausa de listes entàs pròplèu eleccions municipaus e tath Conselh Generau d’Aran entara sua aprovacion, atau e coma mèrquen es Estatuts deth partit, e que sigueren aprovades per unanimitat dera militància.
En aguesti comicis Unitat d’Aran presente listes en tretze Entitats Menors Descentralizades, sèt des nau municipis aranesi e en toti es Terçons d’Aran.
Maria Vergés, secretària generau d’UA, sindica d’Aran e canditata ara sindicatura, a manifestat que “en Unitat d’Aran afrontam aguestes eleccions damb fòrça illusion e damb talents de dar a conéisher es nòstes prepauses e balanci d’aguesta legislatura perque, mès enlà d’èster convençudi e convençudes de qu’eth nòste projècte ei eth mès solvent e avient entà Aran, èm er unic partit aranés damb capacitat de negociacion e infloéncia dehòra dera Val d’Aran”. Atau madeish, Vergés a volut arregraïr “a toti es òmes e hemnes, deth prumèr ath darrèr, que formen part d’aguestes listes e qu’an demostrat eth sòn compromís e generositat damb era Val d’Aran e era sua gent”.
HÒNT: UNITAT D'ARAN
HÒNT: UNITAT D'ARAN
Manu Moga