Un aranés morís en un accident ena N-230 en tèrme de Viacamp (Òsca)

Iñaki Romero, naturau de San Sebastián, e vesin dera Val d'Aran pendent fòrça ans, a morit aguest maitin en un accident qu'a agut lòc en punt quilometric 77,8 dera a N-230 en tèrme municipau de Viacamp, província d'Òsca. Iñaki, que trebalhaue actuauments ena Tauèrna Urtau de Vielha, a patit ua laspanada frontau damb un aute veïcul tàs 10:00. En aguest accident, tanben i a agut un totau de quate persones herides de desparièra consideracion. 

A causa d'aguest eveniment, era N-230 s'a talhat ath transit entà poder retirar es veïculs. A compdar des 12:30 enquiàs 14:00, se daue pas alternatiu pera via. Pòques menutes dempús des 14:00 era normalitat tornaue ara carretèra. Enquiath lòc der accident s'an desplaçat pompièrs deth parc de Benabarre deth SEISPC dera comarca aragonesa dera Ribagorça, era Guàrdia Civila, un elicoptèr e diuèrses ambulàncies.