Ua naua app mobila optimizarà en Aran era remassada de carton pòrta a pòrta des establiments

Optimizar eth servici de remassada pòrta a pòrta de carton des establiments dera Val d’Aran. Aguest serà eth prètzhèt dera naua aplicacion mobila qu’eth govèrn aranés se trape en tot acabar de desvolopar e que pròplèuments serà disponibla.  

Jos eth nòm JORECICLI, damb aguesta app, es establiments que volguen sollicitar eth servici de remassada pòrta a pòrta de carton, poderàn generar ua alarma que s'associarà ath sòn punt de recuelhuda e informarà ara enterpresa gestora.

De moment e coma pròva pilòt, sonque se remassarà era fraccion deth carton damb aguesta app. Totun, era idèa ei esténer eth servici a d’auti materiaus coma plastics o veire.

Mercés a JoRecicli, era enterpresa de recuelhuda saberà damb anticipacion es punts pes qu'a de passar, en tot poder atau optimizar era rota e es mejans a emplegar.

Ath delà, eth Conselh Generau d’Aran poderà abilitar as bailes e servicis municipaus entà crear alarmes de recuelhuda de voluminosi. En aguest cas poderàn geolocalizar es residus abandonadi e dera madeisha manèra qu'eth carton, era enterpresa de recuelhuda les aurà localizadi entà amiar a tèrme era sua recuelhuda.