UA inste ar Ajuntament de Bossòst a cuedar er espaci urban e es installacions deportives

Eth grop d’Unitat d’Aran en Bossòst a instat aué ara equipa de govèrn a suenhar er espaci urban e es installacions deportives municipaus deuant der estat d’abandon e deishadesa detectat pendent es darrèri mesi. Eth còsso portavotz, Amador Marqués, s’a mostrat preocupat “pera imatge d’abandon d’elements urbans coma es flors que decòren er espaci public deth municipi, damb un caractèr eminentaments toristic”. Tanben s’a queishat deth “descontròl” que patissen es installacions dera Zòna Deportiva, coma s’a pogut comprovar pendent aguest ostieu.


En aguest sens, eth grop municipau a mostrat un balanç “negatiu e decepcionant des prumèri mesi der actuau govèrn locau”, pr’amor que “s’a preocupat mès de cercar errors der anterior govèrn, en tot hèr d’oposicion ara oposicion”. Marqués a declarat que “aguesta actitud hè a pèrder eth temps ar Ajuntament e ath municipi, qu’a de besonh un govèrn damb volontat de somar e servir ath conjunt dera ciutadania”.