Trebalh conjunt en Aran còntra es propòstes entara N-230 de Foment

Dempús dera darrèra amassada de bailes dera Val d’Aran ena sedença deth Conselh, contunhe era preocupacion pes propòstes de Foment entara milhora dera carretèra N-230 e còntra es quaus dejà s’an presentat allegacions pr’amor que se considère que non an en compde era realitat deth territòri.

Eth principau motiu d’aguestes allegacions ei qu’eth Ministèri non arreconeish aguest tram de carretèra coma eth corredor centrau deth transpòrt pesat qu’ei, peth quau circulen mès de 500 camions ath dia.

Tant eth Conselh coma es Ajuntaments aranesi considèren qu’es traçats que prepause eth Govèrn espanhòu non s'adapten de cap des manères ar entorn e es interèssi dera Val d’Aran.

Er Ajuntament de Vielha e Mijaran a plantejat que s’analize en profunditat era opcion 1 que plantege Foment, coma dejà auien parlat damb es alcaldes des pedanies deth municipi ena darrèra amassada que mantengueren. D’entre toti es estudis que s’an encargat entà analizar es afectacions d’aguestes propòstes, eth consistòri s’harà cargue der impacte socio-economic que poirien auer es milhores que plantege eth Ministèri.

Encara que, per ara, se coneishen sonque es propòstes de Foment enes trams dera N-230 entre Sopeira e eth municipi de Vielha e Mijaran, aguest estudi afectarà tanben e fòrça ath Baish Aran.

S’a decidit tornar a presentar a Foment eth madeish projècte de milhora dera nacionau elaborat peth pais en an 2003e lutar de manèra conjunta en aguestes allegacions entà arténher era milhor solucion entath conjunt dera Val d’Aran.